बनेपाको नेतृत्व लिन आजैदेखि तयार रहनुस् ।

केही दिन अघि हामीले हाम्रै बनेपाको लफडा हेरिहाल्यौँ । करै-कर र निगमको नालायकीका कारण भएको पेट्रोलियम पदार्थको मुल्यवृद्धिले हाम्रो ढाड सेकिएकै छ। हाम्रो नेताहरु कहिल्यै सुध्रिनेवाला छैनन् । अब ६५ वर्ष देखि वृद्ध भत्ता दिने रे ! कतै किरियाका लागि खर्च तथा कतै सुत्केरी खर्च दिने रे !  दिनु त राम्रो हो तर उत्पादन खोइ ? युवालाई रोजगारी खोइ ? भ्रस्टाचार, घुसखोरी, कमिसनखोरी, कालाबजारी, नातावाद, कृपावाद जस्ता देशका तमाम बेथितिको अन्त्य खोई ?

स्रोत, आम्दानी र उत्पादन बिनाको वितरण थेग्न सक्छ देशले ? यसले के संकेत गर्छ ? यसले यी नेताको कुनै "भिजन" नभएको संकेत गर्छ । र, देश छिट्टै श्रीलंकाको हालतमा पुग्ने संकेत गर्छ ।

अर्कोतिर हाम्रो समाज । उसलाई आफु, आफ्नो परिवार, आफ्नो घर, आफ्नो सुखसुबिधा बाहेक अरुको मतलब छैन । बस् सुँगुरको सपना जस्तै आफ्नो डुँड भरिए पुग्छ । उसलाई सुशासन हैन, आफ्नो मान्छेलाई ठाउँमा पुर्याएर फाइदा लिनु छ । हिमाल ढलोस् कि सिमा सरोस् , न्याय मरोस् कि सत्य जलोस् उसलाई बाल छैन । देशको माया छैन । सही र गलत थाह छैन । पार्टीको दासत्व भित्र पार्टीकै झन्डा ओढेर जनता जुधाउँछन्  । भ्रष्ट र दुष्टको शासनमा  गिद्द र हुँडार लुछाचुँडी गर्छन् । सिनोको टुक्रामा झिंगा रमाउँछ्न् । अब हामी परिवर्तन हुनुपर्छ । र यो भेडाबाख्राको बथानलाई मान्छे बनाउनुपर्छ ।

यो अवसर हामीसंग छ । ५ वर्षको समय पनि छ । बालेन शाह, हर्क साम्पाङ, गोपाल हमाल जस्ता स्वतन्त्र उम्मेदवारको बिजयले देशमा नयाँ आशा पलाएको छ । उनीहरुले राम्रा काम गरे भने अर्कोपटक देशमा नयाँ लहर आउनेछ । युवाहरु संगठित हुने अवसर हुनेछ । नयाँ पार्टी बन्ने अवसर हुनेछ । यी थोत्रे नालायक पार्टी बिस्थापित गर्ने अवसर समेत हुनेछ ।

हामी सबैको देश बदलिएको हेर्नै चाहाना हो । त्यसैले केही सुरुवात हामी गर्दै गरौं । जनतासंग जोडिँदै गरौं । जनतालाई जगाउँदै गरौं । सचेत पार्दै गरौं । जनताका समस्या उठाउँदै गरौं । जनताका चासो र सरोकारका विषयमा छलफल, बहस, वकालत, पैरवी गर्दै गरौं । युवाहरु संगठित हुँदै गरौं । 

म एउटा फरक भुमिकामा काम गर्न गइरहेको छु । त्यसको अर्थ मैले हरेस खाएको होइन । बनेपा बदल्ने, देश बदल्ने मेरो सपना ज्युँ का त्युँ छ। मैले प्रत्यक्ष राजनीति गर्न त मिल्दैन ।  तर म जनतासंगै रहनेछु । जनताको कुरा सुन्नेछु । जनताका समस्याको वकालत गर्नेछु । र आवश्यक परेमा म फेरी मैदानमा उत्रनेछु । तर मेरो प्राथमिकता चाहीँ तपाईंहरु मध्येबाट नयाँ नेतृत्व आवोस भन्ने हो । 

अर्को स्थानीय चुनावमा देशमा बलियो जग हाल्नुपर्छ । अहिलेजस्तो ३ ठाउँमा होइन, देशै भर स्वतन्त्र उम्मेदवार जित्ने लहर ल्याउनुपर्छ ।  त्यसैले बनेपाको नेतृत्व लिन तयार रहनुस् । बनेपाको प्रमुख हुने हो कि उपप्रमुख ?आफ्नो वडाको वडाध्यक्ष हुने हो कि वडा सदस्य सोच्दै गर्नुस् है । अर्कोपटक पालो तपाईंको हो !

मैले बनेपाको १४ वटै वडाका युवा युवती समेट्न १४ वटा म्यासेन्जर ग्रुप पहिल्यै बनाएको थिएँ । अब १४ वडाको "देश बदल्ने सपना" नामको फेसबुक ग्रुप पनि बनाएको छु । यो अवधारणामा बिश्वास गर्ने साथीहरू "जोइन" गरौं । उस्तै बिचारका साथीलाई पनि "जोइन" गराऔँ। बिचार नमिल्ने साथीहरू म्यासेन्जर ग्रुपबाट हट्न सक्नुहुन्छ । कोही साथी एडमीन को रूपमा यी म्यासेन्जर तथा फेसबुक ग्रुपको जिम्मा लिन चाहानुहुन्छ भने स्वागत छ । मलाई भन्नुहोला ।  म handover गर्नेछु ।

नयाँ यात्रामा सबैलाई स्वागत छ ।

*ब्लगका केही अंश हर्क साम्पाङको गीतबाट साभार गरिएका छन् ।