के हामी फरक फरक स्वरूपमा एउटै भगवानको प्राथना गरिरहेका छौं ?

कृष्ण र  क्राइस्टका सम्बन्धमा तलका तथ्यहरु बिचार गरौँ है त !

१. नाममा समानताहरू –' क्राइस्ट' र 'कृष्ण' –बीच  समान उच्चारण छ  । कृष्णको अर्थ "गाढा/कालो रङको" र ख्रीष्टको अर्थ "गाढा/जैतूनको तेलले ढाकिएको" हुन्छ ।

२. दुवैलाई मुक्तिदाता भनियो र दुवै त्रिमुर्ति (ट्रिनिटी) को दोस्रो व्यक्तित्व थिए ।

३. हिन्दूहरूका अनुसार कृष्ण भगवान विष्णुको ८ औं अवतार हुन् – रक्षक/पालनहार हुन्  र हिन्दू देवताहरूको त्रिमूर्ति ब्रम्हा, बिष्णु र महेश मध्ये दोस्रो व्यक्तित्व हुन्  । अधिकांश इसाईहरूले विश्वास गर्छन् कि ख्रीष्ट (येशू) परमेश्वरको पुत्र हुन् , ट्रिनिटीको Father, Son & Holy Spirit  मध्ये दोस्रो व्यक्तित्व हुन् ।

४. दुवै पृथ्वीमा मानिसको रूपमा अवतरण भएका थिए । दुवैलाई मानव र ईश्वरीय दुवै रुपमा मानिन्छ ।

५. दुवै अलौकिक रुपमा जन्मेका थिए । विष्णु स्वयं देवकीको गर्भमा अवतरण भई उनको छोरा कृष्णको रूपमा जन्मेको मानिन्छ  । (Holy Spirit) पवित्र आत्मा मरियमको गर्भावस्थाको लागि जिम्मेवार थिए ।

६. दुबै असामान्य स्थानमा जन्मेका थिए । कृष्णको जन्म जेलको कोठरीमा भएको थियो । ख्रीष्टको जन्म गुफामा भएको थियो, यद्यपि कोहीले गोठको डुँडीमा जन्मेको मान्दछन् ।

७. दुबैको जन्म हुँदा रात थियो र मानिसहरु निन्द्राको अवस्थामा थिए ।

८. उनीहरुको जन्म पछि उनीहरुको जन्मस्थल प्रकाशले उज्यालो भएको थियो  ।

९. कृष्ण जन्मदा आकाशवाणी भएको थियो । क्राइस्ट जन्मदा देवदूतले चेतावनी जारी गरेका थिए ।

१०. ख्रीष्ट र कृष्ण दुवै युवा हुँदा स्थानीय शासकको डर, त्रास र धम्की खेप्नु परेको थियो । कंसले कृष्णलाई मार्न चाहेका थिए । यसका लागि उनले राक्षसहरू पठाएका थिए  । येशू ख्रीष्टको पनि यस्तै कथा छ जसमा दुष्ट राजा हेरोदले ख्रीष्टलाई मार्न शाही आदेश जारी गरेका थिए  ।

११. भगवानको मृत्यु सुनिश्चित गर्न दुबै कथाहरुमा निर्दोष केटाकेटीहरूलाई मारिएको थियो । आफुलाई “मार्नेवाला बच्चा”को मृत्यु सुनिश्चित गर्न कंसले देवकीका सबै सन्तानहरूलाई मारेको थियो । यही कथा बाइबलमा म्याथ्यूमा निर्दोषहरूको नरसंहारको कथाको रूपमा पनि देखिन्छ जहाँ राजा हेरोदले बेथलेहेमका सबै साना केटाकेटीहरूलाई येशूको मृत्यु सुनिश्चित गर्न मार्न आदेश दिएका थिए ।

१२. तिनीहरूका आमाबाबु बसेका ठाउँहरूको नाममा समानता थियो । कृष्णका आमाबुवा देवकी र वासुदेव “मथुरा” राज्यका थिए । मरियम र यूसुफ “मुटुरिया”मा बस्थे ।

१३. कृष्ण र येशू ख्रीष्ट दुबै शाही वंशका थिए तर उनीहरूले बाल्यकाल एक साधारण केटाको रूपमा बिताए ।  कृष्ण गोठालो थिए  । ख्रीष्टलाई प्रायःभेडागोठालोको रूपमा चित्रण गरिएको छ ।

१४. दुबै शासकबाट लुकेर अन्तै हुर्किएका थिए - भगवान कृष्ण कंसबाट लुकेर गोकुल/वृन्दावनमा हुर्केका थिए, जबकि येशू हेरोदबाट लुकेर इजिप्टमा हुर्केका थिए ।

१५. तिनीहरूका पालनपोषण गर्ने आमाबाबुले कर तिर्न जानुपर्थ्यो – कृष्णका पालनपोषण  गर्ने बुबा नन्दले कर तिर्न मथुरा जानुपर्थ्यो , जसरी येशूको पालनपोषण गर्ने पिता जोसेफले कर तिर्न बेथलेहेम गएको कुरा लुकको सुसमाचारमा रेकर्ड गरिएको छ ।

१६. कृष्ण चंचल र चकचके केटा थिए । येशूले मन्दिर जान आफ्नो आमाबाबुलाई छोडेका थिए  ।

१७. पहाडसंगको सन्धर्भ  - कृष्णले गोबर्धन पर्वतलाई उठाएको बताइन्छ । येशुले भनेका थिए : "यदि तिमीमा रायोको दाना जस्तै विश्वास भएको भए तिमीले पहाडलाई आफैलाई उखेल्न र समुन्द्रमा फ्याँकिदिनको लागि भन्ने थियौ "।

१८. विशाल सर्पसंगको सन्धर्भ-

एक दिन नदीको छेउमा खेल्दै गर्दा बच्चाहरूले यमुना नदीमा विष मिसिएको देखे, त्यसैले विष हाल्ने कालिया नागलाई मार्न कृष्ण नदीमा पसे । उनले कालिया नागको टाउकोमा नाच्दै उसलाई नदी छोडेर जान आदेश दिए र नदीलाई फेरि सफा बनाए ।

यो कथा जस्तै, यहोवाले “लेविथान”लाई मारेका थिए । (यहोवाले “लेविथान”लाई सर्प भनेका छन् जसको धेरै टाउको छ, जुन एक समुद्री प्राणी हो र जो एक घिनलाग्दो शैतानको प्रत्यक्ष नेतृत्वमा थियो ) । येशू शुद्धीकरणको लागि नदीमा जानुहुनेछ । “त्यस दिन परमप्रभुले आफ्नो भयंकर तरवारले समुद्री राक्षसलाई दण्ड दिनुहुनेछ । र समुद्रमा भएको राक्षसलाई मार्नुहुनेछ । ” यशैया 27:1

१९. दुबैले रोग निको पार्ने लगायत धेरै चमत्कारहरू गरे ।

२०. दुवैलाई सर्वज्ञ (सर्व-ज्ञानी), सर्वशक्तिमान, र सर्वव्यापी (सदाबहार) मानिएको छ ।

२१. कृष्ण र येशूको मिशन एउटै थियो - मानवताको मुक्ति ।

२२. Sermon of the Mount (पर्वतमा उपदेश) र डिसेम्बर महिना –

डिसेम्बर २५ लाई “क्रिसमस”को रूपमा मनाइन्छ । भगवान कृष्णले कुरुक्षेत्रमा भगवद-गीताको उपदेश दिएको समयका रुपमा  डिसेम्बर २३ मा “गीता जयन्ती” उत्सव मनाइन्छ । ख्रीष्टको "पर्वतमा उपदेश" र कृष्ण रथमा सवार भई अर्जुनलाई दिइएको कृष्णको गीतोपदेश मिल्दोजुल्दो छ  । भगवद-गीता एक उपदेश हो, जुन ५००० वर्ष पहिले दिइएको थियो, जसले सबै मानिसहरूलाई अपरिहार्य आध्यात्मिक मार्गदर्शन प्रदान गर्दछ  ।  ख्रीष्टको उपदेशको बारेमा पनि सोही कुरा भनिन्छ, जुन जैतूनको पहाडमा भएको मानिन्छ ।

२३. शिक्षामा समानता -

•हामीले भगवद-गीतामा यो सिक्छौं कि कृष्णप्रति पूर्ण भक्तिले मानिसलाई अनन्त जीवन प्राप्त हुन्छ र मृत्यु कहिल्यै थाहा हुँदैन । नयाँ नियममा हामी ख्रीष्ट नै एक मात्र बाटो हुनुहुन्छ भनेर सिक्छौं । "ख्रीष्टमा विश्वास गर्ने कोही पनि नाश नहोस्, तर अनन्त जीवन पाओस् ।"

• भगवद्-गीता (७.६-७) मा कृष्णले भन्नुहुन्छ, "सम्पूर्ण ब्रह्माण्डको कारण म नै हुँ, मद्वारा नै यो सृष्टि र विघटन हुन्छ, सबै चीजहरू ममा निर्भर छन् जसरी मोतीहरू धागोमा बाँधिएका हुन्छन् ।" येशूले भन्नुभयो, "उहाँबाट र उहाँद्वारा, र उहाँमा, सबै चीजहरू छन् । सबै चीजहरू उहाँद्वारा बनाइएका थिए; र उहाँ बिना बनाइएको कुनै पनि चीज थिएन। (यूहन्ना १:३)

• कृष्णले भनेका थिए (भ. ४.७), "धर्मको स्थापनाको लागि म समय-समयमा जन्मन्छु ।" यसलाई यूहन्ना १८:३७ मा येशूसँग तुलना गर्न सकिन्छ , जहाँ उहाँले भन्नुहुन्छ, "तिमी भन्छौ कि म राजा हुँ  । यस उद्देश्यका लागि म जन्मेको थिएँ, र यसै कारणले म संसारमा आएको हुँ, कि म सत्यको साक्षी बन्न सकूँ । सत्यमा रहने प्रत्येकले मेरो आवाज सुन्छ ।”

२४. धारिलो हतियारको चोटले दुवैको मृत्यु भयो । कृष्ण वाणले र ख्रीष्ट किल्ला-काँटीको चोटले मरेका थिए  । कृष्णले यो पृथ्वी  त्याग गर्दा उनको खुट्टालाई बाणले छेडेको थियो भने येशुको पाखुरा भालाले छेडिएको थियो ।

२५. शास्त्रहरूमा दुवैले फेरि अवतार लिएको भनिएको छ ।

त्यहाँ ख्रीष्टको दोस्रो आगमनलाई संकेत गर्ने धेरै अशुभ संकेतहरूको वर्णन छ । कृष्णको अर्को अवतार कल्किको रूपमा हुने कुरा वेदहरूमा प्रकट गरिएको छ जसमा कलिको भयानक युग (जुनबाट हामी गुज्रिरहेका छौं )को अझ धेरै भयानक लक्षणहरू छन् जसले कृष्ण (भगवान विष्णुको) को आगमन अघिको समयलाई संकेत गर्दछ  ।

उपसंहार: हामी फरक फरक स्वरूपमा एउटै भगवानको प्राथना गर्छौं ।

इन्टरनेटमा उपलब्ध विभिन्न स्रोतहरु बाट यस ब्लगरद्वारा अनुवादित ।

क्राइस्ट र कृष्ण जस्तै "पैगम्बर मोहम्मद" को कथाहरुमा पनि धेरै समानता छ । त्यी के के हुन् ? त्यो तपाईं पत्ता लगाउनुस है त !